يكش تولع

يكش تولع ..

اهداء من صديق عمرى ( حسن " فارس قلبها " )

........

لما قالو الثوره قامت
صحت الناس لما نامت
كلهم على عومها عامت
قلت فرصه .. يكش تولع

لما قالو ان السياسه
كلمه حلوه فى دور كياسه
حتى لو كان انتكاسه
واحنا مالنا مايكش تولع

لما قالو ان السادات
حرر الاحرار ومات
قمت باصص من سكات
قلت لعدوه يكش تولع

لما قالو زعيمنا جانا
كل همه ياكل شقانا
هنتهرى ضرب فى قفانا
قلت برضه يكش يولع

يكش يولع دا اللى جابه
واللى كان ناسب جنابه
لو فى يوم يعدم شبابه
كنت اقوله يكش تولع

لما قالو مراتو جتنا
لمت شباب وبنات حارتنا
يرقصوا على صوت صاجاتنا
قلت اشطة خلاص هتولع

لما قالو نبيع بترول
بأرخص الاسعار معقول
بيه اخونا يكون مقتول
قلت ليهم يكش يولع

لما قالو بيع القضيه
هنأكلك لقمه طريه
ونعيشك عيشه هنيه
قلت لأ .. وإن شالله تولع

لما قتلو فى عينى دره
قالو نحنى راسنا مره
والسجود للعدو مره
قلت انسو يكش تولع

لما نام شيخنا الهمام
هوا فى الاحلام تمام
قائد الجيش للامام
والنيران من حربه تولع

لما راح باس اليهودى
اللى بيقتل جدودى
الحسودى ابن الحسودى
قلت اشوف فيك يوم وتولع

لما قلنا الحرب دايره
والجراح فى قلوبنا غايره
قال لنا : انا كنت نايم
بحلم انى فراشه طايره
ضحكت من الغلب اللى جانى
واللى عشش فوق زمانى
قلت امته هشوفه تانى
بعينى فيه النار بتولع

لما قام قال النقاب
شىء قديم مافيهوش حساب
دا المزه فيه شبه الغراب
وندى فرصه للشباب
يملى عينه من الجمال
قلت روح صدق اللى قال
القرد فى عين امه غزال

يا حج خاف يوم السؤال
يوم مافى جهنم هتولع

عاملى فيها عبيط مش فاهم
بين دولار وريال ودراهم
يارب ما تلاقى اى مراهم
لما النيران فى دماغك تولع

.................

تأليف : فارس قلبها