الأربعاء، مايو 06، 2009

السيف البتار .. فى الرد على واحد حمــــار


كعادتى كنت بتسكع بين المدونات ومن هنا لهناك .. ومن هناك لهنا , إلى أن وصلت إلى مدونة دماغى بتاعت محمد جمدى .. بالطبع المدونة معروفة ومشهورة .. وهى مدونة شيقة بالتأكيد ولكن ...

أسلوب ( أبو دماغ ) الساخر واللى بيعجب ناس كتير وكان عاجبنى أنا شخصياً , انتهى به إلى السخرية حتى من ناس مايعرفش عنهم أى حاجة , وبدأ يتكلم عنهم بطريقة أقل ما يقال عنها إنها ساذجة وغبية .. الأسلوب ده هينتهى بحمدى قريبا جدا إلى السخرية حتى من نفسه .. وبكره هفكره .


بوست يحمل عنوان : السلفية بدون معلم ... كتبه ( أبو دماغ ) من زمان لكن مشوفتوش غير النهاردة , بيتكلم فيه عن منهج السلفية اللى هوا أصلا ما يعرفش عنه غير إسمه , وللعلم أن لا أنتمى لأى جماعة دينية , ولكن الطريقة المستفزة فى الكتابة والطريقة الأكثر استفزازا فى الردود , والديكتاتورية فى حجب أو طرح الرأى على على مزاج (أبو دماغ ) ومنع أى ردود مش على مزاحه إلا اللى هوا هيعرف يرد عليها .. كل دى أسباب خلتنى أنشر التعليق اللى هوا موافقش على نشره فى مدونته .. بالتأكيد لأنه مش على مزاج سعادته .

التعليق بدون زيادة أو نقصان , آه على فكرة يا حمدى إذا ربنا أراد انك تدخل هنا , التعليق دا أنا سميته : السيف البتار فى الرد على واحد حمار , طبعا انت واللى قروا الموضوع بتاعك ممكن يفهموا ليه انا سميته كدا .

نص التعليق :

بص يا أبو دماغ .. انت مشروع نجاح فاشل .. أو مشروع فشل ناجح , وبصراحة انا مكنتش ناوى أرد , لأن أنا متأكد ان كلامى هيكون زى عدمه خصوصا ان ناس قبلى ردت واتكلمت بس ماجابوش معاك نتيجة , بس برضه مش هينفع اعدى كدا من غير ما أرد أصلى مفقوع أوى ..
بس عايز قبل مارد تعرف حاجة , أنا مش سلفى لأن دا شرف لا أدعيه , بس عارف السلفيين على ايه , والظاهر انك متعرفش الكلب من الدب , والألف من صباع رجلك

أولا : بالنسبة لبداية البوست واللى حضرتك بدأته ب عن فلان ابن فلان طبعا بسخرية وتريقة وكأنك شاكك ان سارة تبقى بنت الإسكافى أو مش نتأكد ان صبرى يبقى ابن سراج , أو معندكش دليل ان إيناس تبقى بنت لطفى .. وأسلوب العنعنه اللى بدأت بيه برضه بسخرية واستهزاء واستهبال وكأنه مش أسلوب متبع عند رواة الأحاديث عشان يتأكدوا من صحته ومن رجاله , ولا يمكن سيادتك عندك طريقة تانية أحسن , مانت ليك دماغك بقى واحنا لينا دماغنا

ثانيا : واضح جدا انك غبى ببساطه لأنك متعرفش أى حاجة عن الناس اللى انت بتتكلم عنهم , لأن السلفيين اللى انت بتقول انهم بيدعوا الى عدم استعمال المخ فى منهم أساتذة جامعات وعلماء ومثقفين ومفكرين ودكاترة ومحامين ومهندسين وصيادلة ورجال أعمال .. إلخ

يعنى دول مش ناس جاية من كوكب تانى , معندهمش 3 ودان ولا مناخيرهم ب فتحه واحدة , وبصراحة انا انبهرت من خفة دمك وطعامتك فى حكاية ( الأديداس ) دى ..
ياعسل .. يا طحينة .. يا بارد ( دى مش فى التعليق )

بتقول : والله من وراء القصد
يا ترى دا برضه تبع أسلوبك الساخر الشاخر ولا دى حاجة تانية

(الشيخ : محمد بن حمدى
تاريخ فعلى :أحد أيام القرن الحادى والعشرين
تاريخ عقلى : أحد أيام القرن الثالث الهجرى )

طيب بالنسبة للشيخ محمد حمدى فدى أصلا مرتبة انت متعرفش توصل ليها , أما بقى بالنسبة لحكاية القرن الثالث الهجرى , فعادى ممكن نسقطه من التاريخ لو سيادتك معترض عليه , القرن الثالث دا اللى مش عاجب جنابك كان من أزهى عصور الدولة الإسلامية .. عارف يعنى ايه أزهى ولا تعليمك فرنساوى ؟؟
القرن التالت ده اللى سيادتك مش عاجبك طريقة التفكير فيه شهد أكبر حركة علمية فى التاريخ الإسلامى والعربى , والقرن دا بالذات وبالنسبة لتشغيل العقل كان انطلاقة فى الأدب العربى الإسلامى ومبادىء العلوم اللى بعد كدا أخدها الأوروبيين وبدأوا بيها مشروعهم الحضارى , يا ترى حاسس انك فاهم حاجة ؟؟

(إحفظ من القرأن ما يساعدك على مجادلة العلمانيون الكفرة أعداء الدين ولا تنسى حفظ الأيات بنصها ,)
أعتقد ان دى حاجة فى حد ذاتها كويسة , إلا إذا كان سيادة جنابك من العلمانيين الكفرة عشان كده واجعاك أوى , وبالنسبة لحفظ الآيات بنصها فانت شايف حاجة تانية ولا إيه بالنسبة للحفظ ؟؟
وفى حاجة بقى عشان بس انا متشدد شوية
هيا المفروض تكون : مجادلة العلمانييييييييين الكفرة , مش مجادلة العلمانيووووون .. يا أستاذ يا صحفى يابو دماغ , تقدر تقوللى ليه ولا انت غياب النهاردة ؟؟

( وأحذرك أخى المؤمن من قراءة عدة تفاسير لعدة شيوخ , فقط إقصر قراءتك على شيخ واحد , وكلما كان الشيخ أكثر تشددا كلما كان افضل , وكلما كان تفسيرة أكثر صعوبة كلما كان ذلك أصعب لتضليل الكافر الملحد الذى يجادلك)
عشان بس أعرفك انك مش عارف أى حاجة فى أى حاجة وبتهرتل وخلاص بمبدأ ان طالما الأسلوب عاجب الناس فمن الطبيعى ان أى حاجة هتنكتب هتعجب
السلفيين يا ابو دماغ عندهم أكتر من تفسير , والسلفيين برضه اللى عندهم أكتر من تفسير عندهم أكتر من شرح لكل تفسير , ولكل شرح من الشروحات الخاصة بكل تفسير من التفاسير أكتر من تحقيق
فهمت حاجة ؟؟ طبعا لأ ..
طيب شغل دماغك معايا وبلاش يبقى مخك (باتا) وانا هحاول أفهمك وأمرى لله
القرآن الكريم
له
أكتر من تفسير , وكل تفسير
له
أكتر من شرح , وكل شرح
له
أكثر من تحقيق
بيتهيألى لو مفهمتش كدا يبقى انت مبتفهمش ومخك جزمة , دا بس فى حالة انك متكونش فهمت
نرجع لموضوعنا : كل التفاسير دى والشروحات دى بيدرسها طالب العلم السلفى ولازم يعرف ايه الاختلافات بينها وايه الأصح من وجهات نظر العلماء , والمفاجأة بقى : انه بيتبع التفسير اللى يحس انه مرتاحله ومستوعبه
يعنى مش بيتفرض عليه انه يفهم الآيات بدماغ حد معين .. فاهم حاجة ؟؟ أشك !

(وإذا إختلف أحدهم معك فى الرأى فإجعل صوتك عاليا مذكرا إياه أنك تحدثه بحديث الرسول وقرأن الله , فهل يجوز الإعتراض عليهما ؟)
طيب بالنسبة للصوت العالى فدا عند السلفيين أصلا مكروه إلا فى حالة الخطابة , أما بالنسبة للأحاديث والقرآن فطبيعى لا يجوز انك تعترض عليهم , وكمان بدماغك دى فماينفعش تفسرهم بمزاجك لأن أصلا العرب اللى هيا لغتهم مافهموش كل حاجة , هتيجى انت يا بتاع ( مجادلة العلمانيوووووووون ) تفسر بدماغك


(لا تجعل محدثك يستدرجك إلى حيث مستنقع التفسيرات المتعدده للقرأن والحديث , ولا تترك له الفرصة ليحدثك عن سماحة الدين ورحمة الله)
عشان بس اثبتلك العكس :
من رحمة الله انى مش هعلق على النقطة يا ابو دماغ

( من رأى منكم منكرا فليغيرة بيدة , فإن لم يكن بلسانه ..... الخ ففى هذا الحديث مدخلا لك للتحكم فى حياة كل من حولك وعدم إستطاعة أحد أن يرد عليك بـ (ملكش دعوه)
فضيلة الشخ محمد بن حمدى : أرجو أن توضح للجهلة أمثالى ما هو موقف هذا الحديث حيث الضعف والقوة أو الصحة والكذب .. وجزاكم الله عنا وعنا الأمة خيرا

(ومن قال أن السلفى لا يتحدث مع إخوته من الفتيات زميلات العمل والكليه ؟ إن ذا لمن الإتهامات التى يتهمنا بها القردة الخنازير من اليهود والأمريكان ومن إتبعهم )
أنا .. أنا بقوللك ان السلفى الصح واللى على حق مبيتكلمش مع أى أجنبية إلا على قدر الحاجة .. ( عارف يعنى إيه أجنبية ؟؟ - أيوة برافو عليك يعنى فرنساوية أو اسكندرانية أو كدا يعنى )


(تتزين بخيمة النقاب , عليك بإهداءها نسخة من كتاب : عود الثقاب . فى طريقة إرتداء النقاب , أو كتاب : غلق الباب , فى فضل إرتداء الحجاب )
تصدق دمك يلطش .. بقى النقاب خيمة يا مهذب .. آه مانت بتبقى مخنوق ومش شايف أى حاجة عشان كدا هتبيض وتلاقى أى خرم فى الخيمة دى .. أعتقد انى قريب هألف كتاب وهسميه : الطريقة الماسخة .. فى تنضيف الدماغ الوسخة


(مثلا تلك الرسالة الإيمانية الرائعة التى تتحدث عن (سلمى) تلك الفتاة الفلسطينية الشابة التى إبتلاها الله بالشلل فى كل انحاء جسدها , وفى احد الايام جائتها السيدة فاطمة الزهراء فى المنام وأمرتها أن تنشر (لا إله إلا الله وأن محمدا رسول الله) بين عشرين من أبناء المسلمين .)
مين قاللك ان السلفيين هما اللى نشروا الموضوع ده ؟؟ دا أكبر دليل على انك متعرفش الجبنة من البطاطس , أول من اخترع موضوع الرسايل دى هما الصوفية لما انتشرت رسالة خادم الكعبة اللى النبى صلى الله عليه وسلم جاله فى المنام وقاله المسلمين بيموتوا على غير دين الإسلام .. إلخ
ثانيا اكتر مروجى الحاجت دى مش مسلمين عشان يثبتوا مدى تخلف المسلمين
ثالثا ودا الأهم : عقيدة السلفين مبنية على التصديق النقلى ( القرآن والسنة ) والعقلى ( يعنى المخ والدماغ .. والاستبيان من الأخبار والإشاعات ..
قال تعالى : " يا أيها الذين آمنو ان جاءكم فاسق بنبأ فتبينوا" , اوعى تقول بقى انى اقصد بالفاسق دا محمد حمدى أبو دماغ وتقولنى كلام مقولتوش

(ويجب أن تنتبه لمتابعة المدونات كل فترة , حيث تمكن الشيطان من قلوب بعض اصحاب المدونات مما يجعلهم يمسحون تعليقاتك الهادفه )
النقطة دى بقى يتقف اثباتها أو نفيها عليك انت .. أكيد فاهمنى .. مش كده ؟؟ .. وهيا دى الحاجة الوحيدة الصح اللى انت قلتها

(وهكذا تعلوا كلمه الله )
دا طبعا بمزاجك أو غصب عنك

وكفاية لحد كدا أوى .. بس عايز اقوللك على كذا حاجة صغيرين فى النهاية

1- بصراحة يا حمدى أنا كنت واخد فيك مقلب جامد

2- نصيحة لما تحاول تتكلم عن حد محترم اتكلم باحترام , ولما تحاول تتكلم عن حد متعرفش عنه حاجه اعرف الأول

3- مش أى حد لابس جلبية قصيرة ومربى دقنه يبقى سلفى , زى ماهوا مش أى حد بيشتم السلفيين يبقى حمار

4- أسلوبك الساخر بيعجب ناس كتير , بس المهم ماتقولش حاجة متعجبش رب الناس

5- اعرف كويس ان مش كل اللى بيشجعوك وبينبسطوا من كلامك معجبين بيك أو بيه .. ممكن يبقوا عايزين يكسبوا واحد لسانه طويل فى صفهم عشان يتقوا شره

6- اى حد ينصحك نصيحة وميقولكش هات مقابل اما خايف عليك أو خايف منك , وانا مبخافش غير من ربى

7- ربنا يهديك .. أو يهدك






دا كان التعليق اللى الأستاذ ( أبو دماغ ) مرضيش ينشره على دماغه .. وأهو كلو بثوابه

هناك 7 تعليقات:

  1. تسلم إيديك يا كبير .. تسلم إيديك يا أبو أدهم ... فعلا أبو دماغ مانشرش التعليق دة .. وواضح إنه مش التعليق الوحيد اللى مانشروش .. تسلم عينيك اللى قرت ومخك اللى فكر ويمينك اللى كتبت وبارك الله فيك يا حبيبي

    ردحذف
  2. انا بس كنت جاية اشكرك على تعليقك عندى على اخر بوست
    علشان اثر فيا

    وقلت بالمرة اقرا اخر بوست عندك

    لاقيت خناقة
    فقلت استخيخ فيها واقول ماليش دعوة
    لانى مقرتش البوست اللى انت كاتب عنه
    وعلشان انا كمان معرفش اوى فى حكاية السلفيين والصوفيين والكلام ده
    يعنى مش هاعرف اقول رايى فى حاجة مش عارفة فيها


    المهم شكرا على تعليقك يا ابو ادهم
    وسلام بقى علشان الحق اروح لماما
    اختك خيخة

    ردحذف
  3. شوفو شوفو شوفوووووووووووو
    مين عندنا ..
    الخيخة جت هنا
    يادى النور يادى النور

    والله انا لو أعرف انك هتيجى هنا كنت فرشتلك البلوج فرد وول .. قصدى ورد وفل ..
    ما علينا المهم انى بجد سعيد جدا انك جيتى هنا , ويا رب متكونش دى آخر مرة والمرة الجاية هكتبلك بلوج تعلقى فيه براحتك , هكتبه عن شريف لو تحبى
    شكرا على زيارتك يا قمر , ومستنيكى تانى فى القريب العاجل

    ردحذف
  4. هاملت ..
    شاعرنا المحترم
    الله يسلمك من كل شر
    وبجد انت نورت مدونتى المتواضعة .. واتمنى تكرر الزيارة

    أخوك : أبو أدهم

    ردحذف
  5. بص يا أبو أدهم
    أنا ضدك من هنا لبكره الصبح
    مش شرط علشان محمد كتب بوست مضايقك
    أو من وجهة نظرك غلط
    طريقة الحوار تتدنى للدرجه دى

    انت لو فتحت البوست عند محمد حمدى وشوفت التعليقات
    هتلاقيني كنت بانتقد اللى كاتبه
    بس باسلوب حوار منظم
    مش كده

    فيها إيه لو كتبت البوست بطريقة أأدب من كده شوية
    ده مش اسلوب حوار

    وانت لو بتكلم أى حد بالاسلوب ده
    حتى لو انت صح 100%
    وهو غلط 100%

    انت مابتعملش إلا إنك بتدعم رأيه ضد السلفيين


    ماكانش نفسى فى أول زيارة ليا عندك اكتب كده
    بس ياريت ماتزعلش
    ده رأى
    فيا ريت تتقبله بصدر رحب

    ردحذف
  6. الأخ :Oss
    أولا رأيك على عينى وراسى
    بس الأستاذ حمدى من البداية ماتكلمش بطريقة تخلى أى حد يرد عليه بطريقة زيها
    فلو كان هوا بدأ يتكلم بطريقة تقبل النقاش كنت ناقشته أنا كمان بطريقة مفبولة
    وماينفعش هوا يفضل يتريق ويستهزأ وانا آجى أكلمه عن الأدب فى الرد ..
    الخلاصة :
    أنا رديت على حمدى بنفس أسلوبه

    شكرا على مرورك وانا باحترم وجهة نظرك دى جدا على فكرة لأنها مطلوبة فعلا بس دا مش مكانها

    أتمنى نشرفنى تانى

    ردحذف
  7. انا جيت
    و اتفرست طبعا جداااا جداااا
    و الصراحة انا مش قريت بوست :دماغي)
    بس انا مع oss فى تعليقة
    سلام فرستنى و انا ماليش مزاج اليومين دول اتفرس

    ردحذف

قال الله تعالى : ما يلفظ من قول إلا لديه رقيب عتيد