الاثنين، مايو 04، 2009

كل سنة والريس بخير

ذكرت جريدة الدستور فى عددها بتاريخ 3 مايو 2009 أن كل من : حبيب العادلى وزير الداخلية , والمشير طنطاوى , وسرور , وصفوت الشريف وغيرهم من كبار رجالات الدولة بادروا بإرسالى االتهانى القلبية للسيد الرئيس حسنى مبارك بمناسبة احتفاله بعيد ميلاده ال 82 , فقلت لنفسى يا عيب الشوم , هوا أنا أقل منهم فى ايه ؟؟

أنا كمان لازم أهنيه بالمناسبة دى , أمال ايه دا خيره علينا كلنا , وبعدين دا الأب الروحى فعيب يعنى اننا منقولوش كل سنة وانت طيب يا بابانا وعقبال 100 سنة .. قصدى ألف سنة .. قصدى زى مانت عايز ..

إهداء خاص منى إلى سيادة الرئيس محمد حسنى مبارك بخصوص احتفاله بعيد ميلاده الـ 82





يا سيادة الريس يا كبير

كل دقيقتين وانت بخير

كان واجب نعملك تورته

ونقولك هابى برث كتير

يا سيادة الريس يا كبير


كان واجب نفرح بجنابك

ونقدم هداياك على بابك

أصلك لسه ف عز شبابك

ونجيبلك طبل ومزامير

يا سيادة الريس يا كبير


بس يا راجل كنت ادعينا

كنا مقولناش لأ .. وجينا

أهو حتى نعلقلك زينه

ونلبس من إيدك طراطير

يا سيادة الريس يا كبير


كنا هنيجى عشان ندعيلك

تفضل جامد .. شادد حيلك

ربنـــا يحـــرمنا ويديــلك

وما يحرمنا من الطوابير

يا سيادة الريس يا كبير


اعذرنى أنا قصرت معاك

ومجتلكش القصر هناك

لكن طبعا أنا وياك

بضميرى أصل أنا عندى ضمير

يا سيادة الريس يا كبير


الشمع .. اتنين وتمانيين ؟؟

والتورته .. متر ف مترين

والحاضرين ناس محترمين

وأكيد ممنوع التصوير

يا سعادة الريس يا كبير


لكن لو قطعت التورته

ابقى افتكر الشعب بخرطة

يمكن ياكلوا وينسوا الورطة

ماهو فعلا عصر التغيير

يا سيادة الريس يا كبير


عيش الكون دا بطوله وعرضه

سيبك م الناس .. بكرا هيرضو

وإن عارضوك طيب مايعارضو

دول حتى شوية صراصير

يا سيادة الريس يا كبير


عيش اللحظة بكل ما فيها

وسيبك من مصر وبلاويها

طول ما حبيبـ ـ ـك هوا حاميها

يبقى أكيد الشعب بخير

يا سيادة الريس يا كبير



إهداء : ابن مصر الباااااااااااااااااااااار- أبو أدهم

هناك 3 تعليقات:

  1. رهييييييييييييييبة
    يا ابو ادهم

    ردحذف
  2. ملحوظة
    الريس عنده 82
    وبقاله ريس 28

    ردحذف

قال الله تعالى : ما يلفظ من قول إلا لديه رقيب عتيد