من أد إيه واحنا
عايشين ومش عايشين ..
ضاحكين على روحنا ..
آل ايه .. كدا صابرين ..
من أد ايه واحنا
بره السجون مساجين ..
بنداوى فى جروحنا
ونمسح دموع العين ..
نصعب على غيرنا ..
والحزن يقهرنا ..
ونراضى ضمايرنا
بإن احنا مش خايفين ..
كاتمين فى قلبنا " لأ "
والصمت مننا طأ
قادرين نقول الحق
بس احنا مش قادرين
طال م الكلام خوفنا
والليل بيخطفنا
ونلوم على ظروفنا
واحنا اللى زينا مين ؟؟
احنا اللى حررنا
طوّرنا .. غيرنا
خضرنا .. عمرنا
دلوقتى ليه خايفين ؟؟
من غير نفس ولا صوت
حابسين وطـــن .. فى تابوت
خايفين نعيش لنمــوت !
فنقوم نعيش ساكتين
راضين بطين الذل
ونزيده بالخوف بل
لو جوعنا هوا الحل
أنا راضى أجوع سنتين
لو جوعنا هوا الحل .. أنا راضى أجوع سنتين
